‘ദി പേൾ ബട്ടൺ’

ചിലിയുടെ അതിമനോഹരമായ തീരപ്രദേശങ്ങളുടെയും സമുദ്രത്തിന്റെയും പശ്ചാത്തലത്തിൽ മനുഷ്യരാശിയുടെ അതിജീവനത്തിന്റെയും കൊളോണിയൽ അതിക്രമങ്ങളുടെയും കഥ പറയുന്ന ചലച്ചിത്രമാണ് ‘ദി പേൾ ബട്ടൺ’ (The Pearl Button – 2015). ഭൂമിയുടെ അറ്റത്തുള്ള പാറ്റഗോണിയൻ കനാൽ മേഖലയിലെ തദ്ദേശീയരായ ജനവിഭാഗങ്ങളുടെ കടലുമായി ഇഴചേർന്നുള്ള ജീവിതരീതികളെയും, നൂറ്റാണ്ടുകളായി അവർ അനുഭവിച്ച ക്രൂരമായ അടിച്ചമർത്തലുകളെയും ഈ ചിത്രം അടയാളപ്പെടുത്തുന്നു. ഒപ്പം ചിലിയിലെ പിനോഷേയുടെ സ്വേച്ഛാധിപത്യ ഭരണകാലത്ത് (1973–1990) രാഷ്ട്രീയ തടവുകാരെ ഇരുമ്പുകമ്പികളിൽ കെട്ടി കടലിൽ എറിഞ്ഞ് കൊന്ന ക്രൂരതകളെയും ഈ ഡോക്യുമെന്ററി ഓര്‍ക്കുന്നു. വെള്ളത്തിന്റെയും സമുദ്രത്തിന്റെയും ആവാസവ്യവസ്ഥയുടെയും ചരിത്രത്തെ രാഷ്ട്രീയവുമായി സംയോജിപ്പിച്ചുകൊണ്ട്, ഭരണകൂടം നടത്തിയ തിരോധാനങ്ങളെയും നരഹത്യകളെയും കടൽ എങ്ങനെ സാക്ഷ്യപ്പെടുത്തുന്നു എന്ന് ഗൂസ്മാൻ അന്വേഷിക്കുന്നു.

2015-ലെ ബെർലിൻ ചലച്ചിത്രമേളയിൽ മികച്ച തിരക്കഥയ്ക്കുള്ള സിൽവർ ബെയർ പുരസ്കാരം നേടിയ ഈ ചിത്രം, പ്രകൃതിയുടെ നിശ്ശബ്ദതയ്ക്കുള്ളിൽ ഒളിഞ്ഞിരിക്കുന്ന ചരിത്രത്തിന്റെ ചോരക്കറകളെ പുറത്തുകൊണ്ടുവരുന്ന ശക്തമായ സിനിമയാണ്.

മലയാളം ഉപശീര്‍ഷകം തയ്യാറാക്കിയത്:
നന്ദലാല്‍ ആര്‍, ഓപ്പണ്‍ ഫ്രെയിം, പയ്യന്നൂര്‍.